Í ökuferð um verslanamiðstöð

Bílstjóri í bænum Augusta í Georgíu-ríki í Bandaríkjunum á yfir höfði sér refsingu eftir að hafa farið í ökuferð um óvenjulegar slóðir. Hann ók bifreið sinni í gegnum glerdyr á verslanamiðstöð borgarinnar og keyrði svo í hægðum sínum framhjá upplýstum búðargluggunum. Til allrar hamingju átti ökuferðin sér stað að kvöldlagi og enginn var því á ferli í verslanamiðstöðinni. Eftir nokkrar misheppnaðar tilraunir tókst öryggisvörðum loks að stöðva manninn en að sögn lögreglunnar í bænum hafði hann skömmu áður lent í rifrildi við eiginkonu sína.