Slapp undan mörg hundruð býflugum

Fimm barna móðir í Arisóna í Bandaríkjunum varð fyrir hræðilegri lífsreynslu á dögunum þegar mörg hundruð býflugur réðust á hana. Konan lifði árásina af.

Christy Cook var á leið að heiman með börn sín fimm. Þau voru að koma sér fyrir í fjölskyldubílnum þegar býflugurnar réðust á Christy. Hún hljóp þegar inn í skjól og hringdi á hjálp.

Christy segir engu líkara en að heimsendir hafi verið í nánd. Hún hafi aldrei á sinni 38 ára ævi lent í öðru eins og jafn brjálæðislegu. Hún hafi verið fullkomlega hjálparvana og við það að fá taugaáfall af hræðslu. Hún hafi ekki geta staðið kyrr. Tunga hennar hafi farið að bólgna og nærri því lokast fyrir öndunarveginn.

Slökkviliðsmenn sprautuðu froðu á húsið til að drepa flugurnar. Christy var flutt á sjúkrahús. Hún fékk að fara heim degi síðar.