Þekktu sjálfan þig: Innsýn í jógafræðin

Í byrjun mars kemur út ný bók eftir Guðjón Bergmann rithöfund, fyrirlesara og jógakennara. Bókin ber titilinn Þekktu sjálfan þig: Innsýn í jógafræðin. Í bókinni leitast höfundur við að veita lesendum innsýn í heim jógaheimspekinnar og kynna hugmyndafræðina sem býr að baki. Öll framsetning er á almennu máli og gagnast því jafnt byrjendum og lengra komnum.

Meðal efnis:

- Skilgreiningar á tilgangi jóga.

- Kynning a fjórum meginstefnum jógaheimspekinnar.

- Einfaldar leiðir til iðkunar á heildrænu jóga.

- Undirbúningur fyrir nemendur.

- Helstu hættur við ástundun.

- Forsendur við val á andlegum kennara.

- Ítarleg hugtakaskrá og bókalisti fyrir þá sem vilja kynna sér efnið nánar.

Að lokinni lesningu ætti hver og einn að hafa aukinn skilning á raunverulegum tilgangi jógaiðkunar, kunna skil á helstu aðferðum og að hafa fengið örlítið dýpri innsýn í jógafræðin.

Úrdráttur úr inngangi bókarinnar:

Á síðustu þrjátíu til fjörtíu árum hefur hugtakið jóga orðið geysilega vinsælt á vesturlöndum, fyrst og fremst í tengslum við líkamsæfingar. Þessar miklu vinsældir hafa jöfnum höndum orðið fræðunum til framdráttar og dregið úr raunverulegu gildi þeirra. Í sumum tilfellum er jóga orðið að tískuorði sem er skeytt við alls kyns aðrar æfingar eða hugmyndafræði til að gera vörur söluvænlegri. Hið jákvæða við þessa þróun er að nú hafa fleiri opnað hug sinn fyrir hugmyndum jógaheimspekinnar en nokkru sinn fyrr. Markmið þessarar bókar er að opna enn frekar heim hinna raunverulegu jógafræða fyrir áhugasömum.

Um höfundinn

Guðjón Bergmann hefur iðkað og kennt jóga allt frá árinu 1997. Á árunum 2001-2006 rak hann farsæla jógastöð í Ármúla 38 í Reykjavík. Hann hefur skrifað fjórar bækur um jóga, gefið út DVD disk með jógaæfingum, geisladisk með slökun, skrifað ótal greinar um jógaiðkun, þjálfað vel á þriðja tug jógakennara í samstarfi við Yogi Shanti Desai og kennt rúmlega fimmþúsund jógatíma. Þekktu sjáflan þig: Innsýn í jógafræðin er áttunda bók Guðjóns á sex árum.