Snjóþyngsli í Danmörku töfðu ferð Íslendings með vörubíl

Umferð í lofti og á láði raskaðist töluvert þegar snjó kyngdi niður sem aldrei fyrr í Danmörku og suðurhluta Svíþjóðar og Noregs í dag. Flugi var frestað og lestir hættu að ganga. Ekki er vitað til þess að alvarleg slys hafi orðið á fólki.

Mest hefur snjóað í norður- og austurhluta Danmerkur, á Skáni í Svíþjóð og í suðurhluta Noregs. Snjómokstur hófst eldsnemma í morgun og hefur haldið áfram fram eftir degi. Fjölmargir hafa ekki komist til vinnu og mörgum skólum verið lokað. Lestarferðum var aflýst, í Danmörku var mikill snjór á lestarteinum. SAS flugfélagið hefur aflýst nærri tvö hundruð flugferðum í dag. Töf varð á ferðum Icelandair til Danmerkur og Svíþjóðar og Iceland Express til Kaupmannahafnar í morgun.

Sighvatur Jónsson, fréttamaður Stöðvar 2 í Árósum í Danmörku, segir að þar hafi snjórinn svo sannarlega sett mark sitt á umfeðrina í dag og ekki bara þar heldur um alla Danmörku. Annar hver Dani hafi haldið sig heima vegna veðurs. Af þeim sem hafi farið af stað hafi 9.000 ökumenn þurft aðstoð, sumir biðu eftir hjálp frá því í gærkvöldi.

Lokun hraðbrauta tafði ferðalag Íslendingsins Marteins Péturssonar, sem var að flytja nýkeyptan vörubíl sinn frá Þýskandi, í skip í Hanstholm á norðurhluta Jótlands. Marteinn segir veðrið hafa tafið hann um fleiri fleiri klukkustundir. Nóttin hafi verið þessi dæmigerða „þrengslastemmning" þeirra Dana. Hann segir veðrið og færðina ekki svo agalega miðað við það sem hann þekki frá Íslandi. Verst sé að margir Danir séu á sléttum dekkjum og bílarnir þvers og kruss á veginum og það tefji.

Miðað við veðurspána gætu margir Danir þurft að moka bíla sína aftur út í fyrramálið, enda ekki hætt að snjóa í Skandinavíu og frekari ofankomu spáð í kvöld og nótt.