Leynilegar áætlanir Bandaríkjanna afhjúpaðar

Bandaríkjamenn hafa gert áætlun um loftárásir á Íran og beinast þær að kjarnorkuverum og innviðum íranska hersins. Ef bandaríkjamenn réðust á Íran samkvæmt áætluninni, myndu íranskir flugvellir, flotastöðvar, flugskeytastöðvar og stjórnstöðvar verða skotmörkin. Bandaríkjamenn staðhæfa að ekki sé ráðgert að ráðast á Íran og eru að reyna að fá sjórnvöld í Teheran til að hætta auðgun úrans.

Sameinuðu þjóðirnar hafa hvatt írani til að stöðva áætlunina um auðgun úrans eða þola refsiaðgerðir.

Á fréttavef BBC segir að það sem gæti fengið Bandaríkjamenn til að ráðast inn í Íran væri staðfestur grunur um kjarnorkuvopnaþróun í landinu. Íranir neita að um slíkt sé að ræða. Enn fremur að árás á bandaríska hermenn í Írak sem ylli dauða margra hermanna og yrði rakin til Teheran, gæti orðið ástæða fyrir árás á Íran.

Fyrrum sendiherra Breta í Íran, Sir Richard Dalton, segir að ef Bandaríkjamenn geri árás á Írana, sé líklegt að þeir eigi aðeins eftir að flýta þróun kjarnavopna til þess að geta gert hefndarárásir.