CIA-mönnum stefnt fyrir rétt

Ítalskur dómari hefur stefnt 26 bandarískum mönnum fyrir rétt vegna ráns á egypskum kennimanni í Mílanó árið 2003. Flestir mannanna starfa fyrir leyniþjónustuna CIA en þeir eru sagðir hafa flutt klerkinn Osama Mustafa Hassan nauðugan í fangelsi í Egyptalandi vegna gruns um að hann tengdist hryðjuverkum. Hassan kveðst hafa sætt pyntingum meðan á vistinni stóð en hann var ekki látinn laus fyrr en síðastliðinn sunnudag. Réttarhöldin hefjast 8. júní og verða að líkindum þau fyrstu þar sem fjallað er um alræmda fangaflutninga Bandaríkjastjórnar.