Slagsmál vegna gleraugnasvika

Gleraugnasali í Toronto í Kanada hefur verið ákærður fyrir að ganga í skrokk á hálfáttræðum fréttamanni sem hugðist fletta ofan af vörusvikum hans. Barsmíðarnar náðust á myndband og verða notaðar í málaferlunum gegn honum.

Sjónvarpsfréttamaðurinn Peter Silverman er 75 ára og því ýmsu vanur en hann hefur sjálfsagt ekki átt von á móttökunum sem hann fékk í King West Optical-búðinni.

Silverman vann að frétt um vörusvik eiganda búðarinnar en eins og sjá má líkaði honum það stórilla. Eftir barsmíðarnar og hráka tók svo við snjókast og frekari fúkyrðaflaumur.

Laganna verðir komu að lokum á vettvang og tóku búðareigandann fastan. Hann hefur verið ákærður fyrir líkamsárás og bíður nú dóms. Málið hefur vakið athygli í Kanada enda þykir þessari friðsömu þjóð það segja meira en mörg orð um vaxandi skort á náungakærleika.