Síðustu leikir skipbrot

"Niðurstaðan er svolítil vonbrigði því við vorum svo nálægt því að komast í undanúrslitin," sagð Logi Geirsson sem átti mjög góðan leik í gær og hann stóð sig reyndar alveg frábærlega á þessu fyrsta stórmóti sem hann tekur almennilega þátt í.

"Eftir tapleikinn gegn Dönum datt svolítið botninn úr þessu hjá okkur. Vonbrigðin voru gríðarlega mikil eftir þann leik. Það er búið að vera andleysi í okkar leik síðan og við höfum ekki komist almennilega í gang á ný. Mótið lofaði góðu og við vorum á siglingu en þessir síðustu leikir eru algjört skipbrot," sagði Logi sem er bjartsýnn á framtíð landsliðsins.

"Við ætlum að koma helmingi sterkari til leiks á næsta móti. Svo má lítið út af bregða í svona mótum eins og við sjáum hjá okkur og síðan Króötum sem töpuðu aðeins einum leik á mótinu," sagði Logi í samtali við blaðamann Fréttablaðsins eftir leikinn í kvöld.