Vann 550 milljónir í spilakassa

John Bromley, 71 árs, setti 100 dollara í spilakassa í spilavíti í Nevada í Bandaríkjunum og áttaði sig ekki á því að hann hafði unnið tæpar átta milljónir dollara, eða tæplega 550 milljónir íslenskra króna, fyrr en sá sem sat við hlið hans sagði honum frá því.

Bromley ákvað að spyrja þann sem sat við hlið hans þegar spilakassinn hætti að virka. Maðurinn benti honum þá á að það væri vegna þess að hann hefði unnið stóra pottinn í spilakassanum.

„Satt best að segja hafði ég ekki hugmynd um að ég væri að spila leikinn." sagði Bromley við fréttamenn. Hann hefur ekki enn ákveðið hvað hann ætlar að gera við peninginn en fagnaði vinningnum með því að fara til vinnu um leið og fríinu lauk.

Breska dagblaðið Metro sagði frá þessu á vefsíðu sinni í gær.