Þjálfari Dana: Leikurinn við Íslendinga sat í okkur

Ulrik Wilbek, þjálfari Dana, var að vonum vonsvikinn í kvöld eftir að baráttuglaðir lærisveinar hans féllu úr leik í undanúrslitunum á HM eftir maraþoneinvígi við Pólverja. Hann segir leikinn við Íslendinga enn hafa setið í hugum og limum danska liðsins í kvöld.

"Við vorum bara ekki mættir í þennan leik í kvöld og spiluðum ekkert sérstaklega vel. Það var eins og liðið skorti hugmyndaflæði þegar komið var fram í framlengingu. Leikurinn við Íslendinga sat í bæði hugum og limum leikmanna og við virtumst bara ekki hafa orku í það sem við vildum gera," sagði Wilbek súr í samtali við TV2.