Snorri: „Ekki dómurunum að kenna“

Snorri Steinn Guðjónsson segir íslenska liðið bara geta sjálfu sér um kennt. „Við vorum að fá á okkur mörk einum fleiri trekk í trekk, við erum að skjóta of snemma í sókninni og gera tæknifeila, þetta liggur eiginlega alfarið hjá okkur", segir Snorri Steinn.

Birkir Ívar Guðmundsson markvörður Íslendinga segir þá hafa verið klaufa gegn Pólverjum. „Við vorum að fara trekk í trekk útaf í tvær mínútur fyrir mjög klaufaleg brot", segir Birkir Ívar sem þó vill ekki kenna dómurunum um neitt.

Guðjón Valur Sigurðsson segir markvörsluna og vörnina hafa klikkað í seinni hálfleik. „Þeir eru með alveg svakalegar byssur fyrir utan og með mjög góðan línumann þannig að það er erfitt að verjast þessu liði", segir Guðjón Valur sem vill meina að liðið geti betur.