Alcan skoðar Keilisnes

Stjórn Alcan á Íslandi kemur saman til fundar í fyrramálið og verður helsta umræðuefnið framtíðaruppbygging fyrirtækisins hérlendis eftir að Hafnfirðingar í íbúakosningu höfnuðu stækkun í Straumsvík. Alcan-menn hafa fundað með ráðamönnum í Þorlákshöfn en einnig með ráðamönnum í Vogum á Vatnsleysuströnd. Róbert Ragnarsson, bæjarstjóri Voga, segir að Alcan-menn hafi komið þangað á fund fyrir rúmri viku og spurst fyrir um það hvort Keilisnes komi enn til greina undir álver. Af því tilefni hafi bæjarstjórnin ákveðið að boða til borgarafundar annaðkvöld þar sem heyra eigi sjónarmið íbúa.

Alcan-menn hyggjast einnig á næstu dögum funda með forvarsvarmönnum Landsvirkjunar sem og nýjum iðnaðarráðherra, Össuri Skarphéðinssyni. Keilisnes-lóðin er á forræði ríkisins, sem keypti hana sérstaklega undir álver þegar viðræður stóðu yfir við þrjú álfyrirtæki í Atlantsálhópnum um álver á Keilisnesi fyrir sautján árum. Sérfróðir menn hafa tjáð Stöð tvö að Keilisnes sé einn skásti kosturinn sem Alcan hefur í stöðunni enda sé lóðin þar þegar skilgreind sem iðnaðarlóð og margvísleg undirbúningsvinna þegar að baki.