Nýmæli í kostun prófessors við HÍ

Friðrik Már Baldursson mun framvegis gegna stöðu prófessors við viðskipta- og hagfræðideild Háskóla Íslands með fulltingi Kaupþings. Í lok síðasta árs gerðu Háskóli Íslands og Kaupþing með sér samning um ótímabundna kostun á stöðu prófessors við deildina. Það er nýmæli hér á landi. Fyrirtæki hafa áður kostað stöður við háskólann en stuðningurinn hefur hingað til alltaf verið tímabundinn.

Í fréttatilkynningu frá viðskipta og hagfræðideild segir að samningurinn sé mikilvægur fyrir Háskóla Íslands. Hann gefi svigrúm til að efla kennslu og rannsóknir í fjármálum og tengdum greinum.

Friðrik Már hefur starfað sem prófessor við viðskipta- og hagfræðideild frá 2003. Hann starfaði áður hjá Hagfræðistofnun Háskóla Íslands og Þjóðhagsstofnun og kenndi við Columbia-háskólann í New York. Rannsóknir Friðriks Más beinast meðal annars að fjármálahagfræði, atvinnuvegahagfræði og hagfræði orkumarkaða.