Samið um viðskiptavakt

Glitnir og 365 hf hafa samið við Saga Capital Fjárfestingarbanka um að bankinn annist viðskiptavakt með hlutabréf félaganna fyrir eigin reikning Saga Capital. Í því felst að Saga Capital skuldbindur sig til að setja daglega fram kaup- og sölutilboð í hlutabréf Glitnis og 365 hf og tryggja þannig seljanleika þeirra. Saga Capital vaktar nú þegar viðskipti með bréf SPRON, Marels og Icelandair Group.

Viðskiptavaktir sem þessar efla viðskipti með viðkomandi hlutabréf og stórbæta þjónustu við hluthafa. Mikil virkni í viðskiptum með hlutabréf fyrirtækja eykur seljanleika þeirra og dregur þannig úr áhættu og viðskiptakostnaði fjárfesta. Að auki leiða mikil viðskipti til gegnsærri verðmyndunar og meiri veltu viðkomandi hlutabréfa.

Í samningi Saga Capital við Glitni skuldbindur bankinn sig til að setja daglega fram kaup- og sölutilboð í hlutabréf Glitnis að lágmarki tvær milljónir að nafnverði á verði sem Saga Capital ákveður í hvert skipti. Hámarksmunur á kaup- og sölutilboðum skal ekki vera meiri en 0,8% og frávik frá síðasta viðskiptaverði ekki meira en 3,0%. Hámarksfjárhæð heildarviðskipta dag hvern skal vera kr. 200 milljónir að markaðsvirði.

Í samningi Saga Capital við 365 skuldbindur bankinn sig til að setja daglega fram kaup- og sölutilboð í hlutabréf 365 að lágmarki ein milljón að nafnverði á verði sem Saga Capital ákveður í hvert skipti.

Hámarksmunur á kaup- og sölutilboðum skal ekki vera meiri en 1,25% og frávik frá síðasta viðskiptaverði ekki meira en 3,0%. Hámarksfjárhæð heildarviðskipta dag hvern skal vera kr. 100 milljónir að markaðsvirði.