Hottar og tottar

Á Mörlandi er athyglisvert stjórnarfar. Þar fer minnihlutahópur Totta með völdin og peningana og hefur gert það svo lengi sem elstu menn muna. Yfirgnæfandi meirihluti landsmanna er Hottar en þeir hafa ekki náð að sameinast vegna illskeyttrar deilu um hvort róttækara sé að vera með græn bindi eða rauð í sjónvarpi og hvort allt tal um fína styrki hjá Evrópusambandinu sé auglýsingabrella. Einstakir Hottahópar, einkum Fjósahottarnir, eru illa þokkaðir fyrir að hafa látið Tottana nota sig til að halda völdum í skiptum fyrir afnot af ráðherrastólum, ráðherrabílum og 300 flugmiðum á Saga Class. Nú eru Fjósahottar í útrýmingarhættu og Hottafylkingin búin að hrifsa til sín stólana og flugmiðana.

HOTTAR OG TOTTAR nota ekki sama gjaldmiðil. Hottarnir vinna ýmsa vinnu en Tottarnir vinna við að totta Hottana. Tottarnir reikna totttekjur í evrum, en Hottarnir skuldir sínar í íslenskum krónum sem eru leifar af gjaldmiðli frá lokum nýlendutímans. Til að sannfæra Hottana um yfirskilvitlegt gildi krónunnar hefur verið fundin upp trúarleg vísitölutrygging sem felst í því að skuldir vaxa í stað þess að lækka við afborganir. Með þessu móti gerist það kraftaverk að Hottarnir borga sama lánið allt að sex sinnum ef þeir lifa nógu lengi, og leitun er á jafn dá­samlegu kraftaverki í veraldarsögunni.

TOTTARNIR EIGA ALLT á Mörlandi nema húsnæðið Hottanna. Það eiga bankarnir. Bankar eru mjaltavélar sem Tottarnir nota til að totta Hottana. Í hvert sinn sem Hotti bregður kreditkorti á loft er hann tottaður. Í hvert sinn sem hann fær sendan reikning er hann tottaður fyrir að fá að vita hvað hann á að borga. Fleiri tott-maskínur eru að sjálfsögðu í gangi til að hámarka nytina úr Hottunum. Þótt mjaltatíminn sé langur finnst mörgum Hottum ekki slæmt að láta totta sig. Þeir fá að horfa á sjónvarp eftir mjaltir og panta sér pitsu og skvetta í sig um helgar.

AÐSKILNAÐARSTEFNA eða apartheid þekkist ekki á Mörlandi. Þar eru allir jafnir. Hottarnir þekkja ekkert annað en að láta Tottana totta sig, enda er það vafamál hvort beljur í nútímafjósum búi við betra atlæti og lífskjör en Hottarnir - og ekki hafa þær kosningarétt.