Alfreð: Sæmilega sáttur með 8. sætið

Alfreð Gíslason segist ekki alfarð ósáttur við að ná 8. sætinu á HM í handbolta og segir leikinn við Dani hafa ráðið gríðarlega miklu um niðurstöðuna. Hann segir skort á breidd hafa verið helstu hindrunina fyrir íslenska liðið á mótinu.

"Þetta var mjög erfiður leikur fyrir okkur. Við vorum að fara illa með fullt af dauðafærum, okkur skorti þolinmæði í sóknarleiknum og réðum illa við línumanninn þeirra. Í fyrri hálfleik vantaði miklu meiri ógnun á vinstri vængnum, en Birkir var þó að verja nokkuð vel í markinu.

Í síðari hálfleik kom það illa við okkur að missa Sverre meiddan af velli og við það riðlaðist varnarleikurinn hjá okkur. Menn eru auðvitað allir orðnir þreyttir og Fúsi var alveg búinn á því. Við erum að keyra þessa leiki alla meira og minna á sama mannskapnum. Þeir Óli, Snorri, Alex og Guðjón Valur eru búnir að spila hverja einustu mínútu í þessum leik og það er mjög erfitt - ekki nógu mikil breydd til að klára svona keppni.

Ég hefði auðvitað viljað vera ofar á þessu móti en í áttunda sæti en ef maður lítur yfir það hvaða lið eru hérna er ekki hægt að segja annað en að áttunda sætið sé bærilegur árangur. Danaleikurinn var mikill vendipunktur í þessu móti og segja má að það hafi verið fjögurra sæta leikur. Þar ráðast úrslitin á fimm sekúndum," sagði Alfreð í samtali við Geir Magnússon á Rúv.