Sex manna sýning á Seyðisfirði

Sýningarhöllin í Skaftfelli á Seyðisfirði er öxullinn í sýningarhaldi á Austurlandi. Þar verður opnuð sýning á laugardag á verkum sex myndlistarmanna. Erla Þórarinsdóttir, Hulda Hákon, Jón Óskar og Steingrímur Eyfjörð sýna þar verk og Hildur Ingveldardóttir Guðnadóttir og BJNielsen setja upp innsetningu á Vesturveggnum og verður sá hluti opinn gestum frá og með deginum í dag. Innsetningu sína kalla þau Brotin milli hleina. Verða listamennirnir með tónleika í kvöld kl. 22. Sýningarnar á Vesturveggnum í sumar eiga það sammerkt að vera unnar af listamönnum sem vinna jöfnum höndum í tónlist og myndlist.

Laugardagsopnunin er með öðrum blæ en atburður dagsins: Erla Þórarinsdóttir sýnir verkið Sameign; opinber rými frá nýlendu- og sjálfstæðistíma, Hulda mun sýna hluta verksins MUNASKRÁ, Jón Óskar sýnir nokkrar teikningar og Steingrímur Eyfjörð sýnir nýtt verk Einar 1 til Einars 2.

Verk Erlu Þórarinsdóttur samanstendur af 6 málverkum af grunnflötum opinberra bygginga í Reykjavík, máluð í skalanum 1:50. Hegningarhúsið, Alþingishúsið, Hnitbjörg, Kristskirkja, Háskólinn og Hallgrímskirkja eru sameignleg rými, viðmið okkar á önnur rými, hegðun okkar, verðmætamat og sjálfsímynd.

Verk Huldu Hákon, MUNASKRÁ eru 350 spjöld þar sem á eru letraðar innihaldslýsingar á 350 kössum sem eru í geymslum Reykjavíkurborgar. Þar eru komnir kassarnir sem starfsmenn borgarinnar notuðu þegar vinnustofa Jóhannesar Sveinssonar Kjarval var tæmd í lok sjöunda áratugarins.

Jón Óskar tínir saman í teikningum sínum flókinn myndheim, iðandi af tilvísunum í listasöguna, samfélagssöguna og sögu Jóns Óskars sjálfs og hans kynslóðar. Yfirbragð verkanna er því kannski torrætt en um leið kunnuglegt því þar er skráð í fljótaskrift frásögn okkar flestra sem lifað höfum sömu tíma og Jón hér uppi á Íslandi og í nálægum löndum, sem er í senn almennt og persónulegt því vinna hans og forvitni hafa opnað Jóni ýmsa sýn og þjálfað hann í þeirri list að tengja ólíkar nálganir og miðla í mynd og texta. Á ferli sínum hefur Jón haldið myndlistinni nokkuð utan við önnur störf sín en oft hefur þó opnast á milli og Jón nýtt sér efni úr hönnunarvinnu sinni og myndskreytingum til að vinna í myndlistarsýningu.

Steingrímur Eyfjörð sýni nýtt verk, 2Einar 1 til Einars 2 og er verkið útlegging á tveimur ljóðum eftir Einar Má Guðmundsson. Steingrímur er í brennidepli athygli sunnar í álfunni en hann er fulltrúi Íslands á Tvíæringnum í Feneyjum.

Sýningin er opin milli 13.00 og 18.00 alla daga og stendur til 11. nóvember.