Kjelling er með indíánahúðflúr

Stórskyttan Kristian Kjelling hjá norska landsliðinu í handbolta segist ákveðinn í að spila leikinn gegn Angóla á morgun þó hann hafi átt við þrálát hnémeiðsli að stríða. Kjelling er með sérstakt húðflúr á handleggnum tileinkað æskuvini hans.

"Ég ætla að spila gegn Angóla hvað sem það kostar," sagði Kjelling í samtali við VG í heimalandi sínu. "Það eru ekki mörg lið þarna úti sem við eigum að bursta - en við eigum að bursta Angóla - það er svo einfalt," sagði Kjelling en hann var í framhaldinu spurður út í skrautlegt húðflúr sem hann ber á öðrum handleggnum.

"Þarna stendur "my fellow brother" (bróðir) á máli Cherokee-indíána. Vinur minn er með eins húðflúr og við fengum okkur alveg eins til að styrkja vináttuna," sagði hinn skrautlegi Kjelling.