Einfölduð sýn fyrir stjórnendur

Tölvubankinn hefur kynnt til sögunnar nýja hugbúnaðarlausn fyrir stjórnendur fyrirtækja og sveitarfélaga sem kallast BizVision. Hugbúnaðurinn verður kynntur á sýningunni Tækni og vit sem hefst á morgun.

Fyrirtækið, sem er með elstu hugbúnaðarfyrirtækjum landsins, segir nýja upplýsingasýn komna í kerfið sem hafi að bjóða einfalda yfirsýn yfir allan fjárhag, starfsmannahald, laun, viðskipti og sölu. „Meðal lykilþátta í kerfinu er fullkomið áætlunarkerfi fyrir fjárhagsbókhald, launabókhald og sölukerfi,“ segir í tilkynningu.

BizVision er vefmiðað forrit þannig að stjórnendur geta haft aðgang að lykilrekstrartölum fyrirtækis eða deildar á jafneinfaldan hátt og að skoða síður á netinu. „Innleiðing á kerfinu er einföld þar sem það getur tengst öllum algengustu bókhaldskerfum sem eru í notkun hjá fyrirtækjum í dag, eins og Navision, Axapta ásamt kerfum fyrir AS/400,“ segja fosvarsmenn Tölvubankans og benda á að við innleiðingu verði því engin röskun í vinnslu, því það komi inn sem viðbót á sviði upplýsingasýnar.

Meðal fyrirtækja og sveitarfélaga sem þegar hafa tekið í notkun BizVision eru BYKO, Elko, Brimborg, Húsgagnahöllin, Industria, Hafnarfjarðarbær, Kópavogsbær, Reykjanesbær.