Iður Bjarna í Iðuhúsi

Bjarni Sigurbjörnsson myndlistarmaður opnar sýninguna Iður í nýjum húsakynnum Anima galleríis í Iðu-húsinu í Lækjargötu.

Bjarni hefur haldið fjölda sýninga bæði hér heima og erlendis og þrisvar verið tilnefndur til Carnegie-verðlaunanna. Hann er þekktur fyrir íburðarmikil málverk sem hann vinnur á plexígler.

Með vísan í titil sýningarinnar er hér um að ræða ýmiss konar kviðarholsmyndir, kjarnasneiðmyndir eða líkamsvessa með öllum sínum fallegu litabrigðum.

Þetta eru í senn skuggamyndir holds, dásamlegar slettur kukls og kynngis í hringiðu mannlífsins, sár á gljúpu hörundi jarðar eða hið hverfula sjúka skinn andrúmsins, hold vatns og tættar silfurmænur eða ef til vill einungis málverk á gagnsæjum fleti, þar sem andhverfunni er snúið að áhorfandanum og eitrað botnfall fegurðarinnar kemur í ljós.

Sýningin hefst kl. 17 og verður opin á þjónustutíma hússins frá 10-22 alla daga. Hún stendur til 15. apríl.