Úthýsa gömlu ljósaperunni

Stjórnvöld í Ástralíu hafa í hyggju að banna hefðbundnar glóðarperur á næstu þremur árum. Í stað þeirra er horft til þess að auka notkun sparneytnari ljósgjafa á borð við flúorperur sem nota einungis 20 prósent af því rafmagni sem hefðbundnar perur nota. Gangi þetta eftir verða Ástralar fyrsta þjóðin til að banna notkun glóðarljósapera.

Malcolm Turnball, umhverfismálaráðherra Ástralíu, segir í samtali við breska ríkisútvarpið að þetta sé ekki mikil bylting fyrir neytendur en hafi umtalsverða kosti í för með sér. Helsti kosturinn er sá að með ljósaperuskiptunum verði hægt að minna losun gróðurhúsalofttegunda um fjögur milljón tonn árið 2012.

Ráðherrann segist vona að stjórnvöld fleiri landa fylgi í fótspor Ástrala. Eitthvað virðist vera að þokast í þá átt því ríkisstjórn Kaliforníuríkis í Bandaríkjunum mun þegar hafa komið með svipaðar tillögur. Það var Thomas Edison sem fann upp ljósaperuna árið 1879 og hafa þær lítið breyst fyrr en á síðustu árum þegar sparneytnari ljósaperur komu á markað.