Rós í hnappagatið

Sir Tom Hunter, Baugur Group og aðrir viðskiptafélagar í fjárfestahópnum West Coast Capital Floris, sem stóðu að yfirtöku á Wyvale Garden Centres í júní í fyrra, bættu annarri breskri blómakeðju í safnið í síðustu viku þegar þeir lögðu fram formlegt yfirtökutilboð í garðvöruverslanakeðjuna Blooms of Bressingham.

Kaupverðið nemur þrjátíu milljónum sterlingspunda, jafnvirði 3,9 milljörðum króna.

Hugsanlegt er talið að Blooms og Wyevale verði sameinuð í eitt en samtals ræður WCC Floris nú yfir 123 garðvöruverslunum. Horft er fram á mikla samþjöppun á breskum garðvöruverslunum. Fjárfestateymið gæti komið mikið við sögu því til viðbótar á það 29,9 prósent í Flying Brands, netvöruverslun með garðvörur, og átta prósent í garðvöruverslanakeðjunni Dobbies Garden.

Getgátur hafa verið uppi um að WCC Floris ráðist líka í yfirtöku á Dobbies en gengi hlutabréfa í síðarnefnda félaginu hefur rokið upp á síðustu dögum.

Einnig telja menn töluverð verðmæti liggja í fasteignum og lóðum sem annaðhvort mætti byggja á eða selja til fjárfesta. Hunter hefur sjálfur hagnast gríðarlega á fasteignaviðskiptum. Þannig er markaðsvirði Dobbies litlu hærra en bókfært virði seljanlegra eigna.

En einnig er horft fram á töluverðan vöxt í geiranum. Í Sunday Telegraph er bent á sívaxandi hóp fólks 65 ára og eldra sem býr yfir auknum kaupmætti. Þannig hefur samanlagður kaupmáttur þessa hóps sjöfaldast á síðustu tuttugu árum.