Hvað leynist í skúffunum?

Verðlaunasjóður íslenskra barnabóka efnir árlega til verðlaunasamkeppni og auglýsir eftir handritum að skáldsögum fyrir börn og unglinga. Sagan skal vera að lágmarki fimmtíu blaðsíður að lengd eða um tuttugu þúsund orð. Ekki er gert ráð fyrir því að verðlaunasagan verði myndskreytt.

Dómnefnd velur besta handritið og kemur það út hjá Eddu útgáfu - Vöku-Helgafelli haustið 2007. Verðlaunin nema fjögur hundruð þúsund krónum auk venjulegra höfundarlauna.

Íslensku barnabókaverðlaunin hafa á undanförnum árum opnað mörgum nýjum höfundum leið út á rithöfundabrautina en á síðasta ári hlutu tvær bækur verðlaunin: Sagan af undurfögru prinsessunni og hugrakka prinsinum hennar eftir Margréti Tryggvadóttur og Halldór Baldursson og Háski og hundakjöt eftir Héðin Svarfdal Björnsson.

Handritin skulu merkt og send til: Verðlaunasjóðs íslenskra barnabóka, Edda útgáfa - Vaka-Helgafell, Síðumúla 28, 108 Reykjavík

Handrit á að merkja með dulnefni en rétt nafn höfundar fylgi með í umslagi.

Skilafrestur er til 15. febrúar 2007.