Lögregla skýtur brúðguma til bana

Lögregla í New York skaut í gærmorgun brúðguma til bana þar sem hann var á leið af nektarstað í Queens ásamt vinum sínum eftir steggjapartý. Brúðkaupið var áætlað seinna um daginn. Lögregluaðgerð var í gangi þar sem fylgst var með staðnum vegna meintrar ólöglegrar eiturlyfjasölu og vændis. Sjö lögreglumenn, einkennisklæddir og óeinkennisklæddir, voru í eða við staðinn þegar brúðguminn keyrði burt undir morgun ásamt vinum sínum. Þá keyrði hann á fótgangandi leynilögreglumann og í tvígang á lögreglubifreið. Lögregla hóf þá skotárás á bílinn með þeim afleiðingum að brúðguminn lést og tveir farþegar slösuðust. Fimmtíu skotum var skotið að bifreiðinni. Ættingjar og nágrannar eru æfir, en lögregla segir of snemmt að segja til um hvort árásin hafi verið tilhæfulaus.