Styrkur hækkar í fjórar milljónir

Ísland fagnar um þessar mundir 60 ára afmæli aðildar að Sameinuðu þjóðunum. Á afmælishátíð sem Félag Sameinuðu þjóðanna á Íslandi hélt í gær tilkynnti Valgerður Sverrisdóttir utanríkisráðherra að framlög ríkisins til félagsins yrðu hækkuð úr 900 þúsund krónum í fjórar milljónir króna.

„Ég er mjög ánægð með þennan samning,“ sagði Valgerður eftir að samningurinn var undirritaður. „Ríkisstjórnin reynir að endurspegla vilja þjóðarinnar í alþjóðamálum og til að fólk hafi áhuga á þessum málaflokki verðum við að styðja við Félag Sameinuðu þjóðanna á Íslandi.“