Íslenska ríkið sýknað af kröfum Ásatrúarfélagsins

Íslenska ríkið hefur verið sýknað í Héraðsdómi Reykjavíkur af kröfum Ásatrúarfélagsins um sambærilegar greiðslu sambærilegra gjalda félagsmanna og greidd eru í kirkjumálasjóð og Jöfnunarsjóð sókna. Allsherjargoði telur þó að um áfangasigur sé að ræða.

Samkvæmt lögum fær Ásatrúarfélagið sóknargjöld frá ríkinu líkt og aðrir þjóðkirkjusafnaðir, önnur skráð trúfélög og Háskóli Íslands. Fjárhæðin reiknast þannig að fyrir hvern einstakling 16 ára og eldri sem skráður er í viðkomandi trúfélag greiðist ákveðin upphæð.

Í málatilbúningi Ásatrúarfélagsins er því hins vegar haldið fram að þjóðkirkjan og sjóðir hennar fái að auki margar aðrar greiðslur, meðal annars samkvæmt fjárlögum og frá ráðuneytum. Séu þær upphæðir 30% til viðbótar við sóknargjöldin. Ásatrúarfélagið telur þetta vera mismunum gagnvart trúfélögum og því hafi það ákveðið að sækja mál gagnvart ríkinu.

Í samtali við fréttastofu sagði Hilmar Örn Hilmarsson, allsherjargoði, hafa átt von á þessari niðurstöðu dómsins. Það sé hins vegar ákveðin áfangasigur fyrir félagið að í dómsorði komi fram athugasemd um að í stjórnarskránni megi finna óréttlæti gagnvart öðrum trúfélögum en þjóðkirkjunni. Það sé ekki hægt að leiðrétta þar sem það sé bundið í stjórnarskrá. Allsherjargoðinn segir að Ásatrúarfélagið ætli ekki að láta hér við sitja, heldur áfrýja málinu til Hæstaréttar.