Fyrsti sigur Iverson hjá Denver

Allen Iverson fagnaði sigri í í treyju Denver í fyrsta sinn í nótt þegar liðið bar sigurorð af Boston, 116-105, í NBA-deildinni. Iverson skoraði 28 stig og gaf 13 stoðsendingar. Dallas sigraði Charlotte auðveldlega, 97-84, og hefur nú unnið sjö leiki í röð.

Josh Howard var stigahæstur hjá Dallas með 27 stig en Dirk Nowitzki var með 23 stig. Gott gengi Pheonix heldur einnig áfram og í nótt vann liðið Portland auðveldlega, 110-87.

Af öðrum úrslitum næturinnar bar hæst að Washington lagði Memphis á heimavelli 116-101 þar sem ótrúleg frammistaða í fyrsta leikhluta lagði grunninn að sigrinum. Washington skoraði þá 45 stig gegn 18 stigum gestanna og má segja að úrslitin hafi verið ráðin strax eftir fyrsta leikhlutann. Þá sigraði Detroit lið New Jersey naumlega, 92-91, en um var að ræða fimmta sigurleik Detroit í röð.