Árita bækur sínar

Eiríkur Guðmundsson og Steinar Bragi árita bækur sínar í Bókabúð Máls og menningar, Laugavegi 18, klukkan sex miðvikudaginn 20. desember.

Undir himninum eftir Eirík Guðmundsson segir frá útvarpsmanninum E, sem hefur um nokkra hríð ekki gert greinarmun á skáldskap og veruleika. Hann hefur gefið út greinasafn og verður fyrir aðkasti frá konum semm annað hvort þekkja sig of vel eða alls ekki í bók hans. E leggur stund á ritstörf á milli þess sem hann heldur við giftar konur, ræðir menningarástandið eða fer í ljós. Dag einn gloprar hann póstkorti út um glugga. Það er upphafið að enn frekari hremmingum. Eiríkur Guðmundsson er löngu þjóðkunnur fyrir skelegga pistla sína í útvarpsþættinum Víðsjá Á Rás 1. Í þessari skáldsögu sýnir Eiríkur á sér nýja og eftirtektarverða hlið og snýr hvað eftir annað á lesendur sína. "Skemmtilegur texti og furðulegur," sagði í fimm stjörnu dómi í Fréttablaðinu.

Hið stórfenglega leyndarmál Heimsins eftir Steinar Braga hefur verið kölluð "óvenjulegasta morðgáta jólabókaflóðsins." Það er myrkt og drungalegt haustkvöld í miðbæ Reykjavíkur þegar undarlegur maður ryðst inn á heimili Steins Steinarrs, leynispæjara. Maðurinn er farþegi á skemmtiferðaskipinu Heiminum sem liggur við festar í Reykjavíkurhöfn og tjáir spæjaranum og aðstoðarmanni hans, Muggi Maístjörnu, að skelfilegir atburðir séu yfirvofandi um borð í Heiminum. Í kjölfarið dragast þeir inn í þéttriðið net morða, blekkinga og kúgunar.