Vilja að afgreiðslu RÚV-frumvarps verði frestað

Stjórn Alfreðs, félags ungra framsóknarmanna í Reykjavík suður, skorar á forystumenn Framsóknarflokksins að fresta afgreiðslu frumvarps um Ríkisútvarpið um óákveðinn tíma eða á meðan málið er rætt betur innan flokksins. Þetta kemur fram í ályktun frá félaginu.

Þar segir að engin knýjandi nauðsyn sé á fyrirhuguðum breytingum eða jafnvel einkavæðingu stofnunarinnar, eins og sumir sjálfstæðismenn vilja. Minnir Alfreð á ályktun miðstjórnar Framsóknarflokksins og málefnastefnuskrá frá 2003 þar sem fram komi þau fyrirheit að RÚV verði breytt í sjálfseignarstofnun sem gerir þjónustusamning við ríkið.