Spennusagnasíðdegi

Alla fimmtudaga fram að jólum verður spennusagnasíðdegi í Kórnum á fyrstu hæð Bókasafns Kópavogs. Það er haldið í samstarfi Bókabúðarinnar Hamraborg, Bókasafnsins og Kaffibúðarinnar í Hamraborg. Fyrsta kvöldið er fimmtudaginn 23. nóvember og hefst klukkan 17.15.

Að þessu sinni kynna þrír spennusagnahöfundar nýútkomin verk.

Jökull Valsson hefur áður gefið út Börnin í Húmdölum sem fékk góðar viðtökur. Hann les nú upp úr Skuldadögum, sögu úr undirheimum eiturlyfja í Reykjavík, "bráðlifandi og grátbroslega lýsingu á raunum ungs gæfulauss einstaklings sem þráir hið ljúfa líf og skjótfenginn gróða en uppsker ekkert nema vandræði" eins og segir hjá útgefanda.

Páll Kr. Pálsson og Árni Þórarinsson eru báðir höfundar fjölmargra bóka sem komið hafa út á undanförnum árum, eins og landslýður þekkir. Fyrir fjórum árum skrifuðu þeir svo saman bókina Í upphafi var morðið - nú senda þeir frá sér bókina Farþeginn, spennusögu um ferðalag í leigubíl sem tekur óvænta stefnu. Páll Kristinn mætir og les upp úr bókinni fyrir viðstadda.

Ævar Örn Jósepsson sendir nú frá sér bókina Sá yðar sem syndlaus er - en áður hafa komið út margar spennusögur hans sem fengið hafa afbragðs viðtökur, og er skemmst að minnast Blóðbergs frá því í fyrra. Sá yðar sem syndlaus er fjallar um miðaldra karlmann sem skilur við eiginkonu sína eftir áratuga hjónaband og missir fótanna...

Allir velkomnir!