Æfingatímabilinu lauk í nótt

Síðustu leikirnir á æfingatímabilinu í NBA fóru fram í nótt en deildarkeppnin hefst með látum næsta þriðjudagskvöld. Í sjónvarpsleiknum á NBA TV í nótt vann San Antonio öruggan sigur á Dallas 100-79, en þessi lið mætast einmitt á þriðjudagskvöldið í fyrsta deildarleik sínum.

Tony Parker var stigahæstur í liði San Antonio gegn Dallas og skoraði 20 stig, en Josh Howard skoraði 15 stig fyrir Dallas.

Það var mikið fjör þegar grannarnir New Jersey og New York áttust við og svo fór að lokum að New Jersey sigraði 138-121 í miklum stigaleik. Steve Francis skoraði 39 stig fyrir New York en var rekinn af velli í lokin fyrir slagsmál. Richard Jefferson skoraði 32 stig fyrir New Jersey.

Atlanta lagði Charlotte 105-94. Argentínumaðurinn Walter Herrmann skoraði 18 stig fyrir Charlotte og Josh Childress setti 15 stig fyrir Atlanta.

Minnesota lagði Milwaukee 101-76. Kevin Garnett skoraði 21 stig fyrir Minnesota en Damir Markota skoraði 17 stig fyrir lið Milwaukee sem stillti upp varaliði sínu í nótt.

Toronto tapaði fyrsta og eina leik sínum á undirbúningstímabilinu þegar það lá fyrir Chicago 108-97. Mo Peterson skoraði 20 stig fyrir Toronto en Ben Gordon skoraði 38 stig fyrir Chicago.

Sacramento lagði Portland 84-78. Brandon Roy skoraði 16 stig fyrir Portland en Kevin Martin var með 26 stig hjá Sacramento.

Loks vann Denver stórsigur á LA Clippers á útivelli 112-86 þrátt fyrir að leika án Marcus Camby og Carmelo Anthony. DerMarr Johnson skoraði 17 stig fyrir Denver en Corey Maggette setti 16 stig og hirti 9 fráköst hjá LA Clippers.

Að lokum er rétt að minna NBA áhugamenn enn og aftur á að deildarkeppnin hefst með látum næsta þriðjudagskvöld og þá verða tvær beinar útsendingar í röð á NBA TV sjónvarpsstöðinni á Digital Ísland. Fyrst leikur Miami og Chicago og síðar um nóttina eigast við LA Lakers og Phoenix Suns, svo ekki er hægt að segja annað en að tímabilið hefjist á sannkallaðri veislu.