Lífsleikni eykur sjálfsvitund og samhygð

Lífsleikni hefur fyrst og fremst að gera með félags- og tilfinningaþroska og er m.a. ætlað að auka sjálfsvitund og samhygð, góð tjáskipti og skapandi hugsun.

Jákvæð sjálfsmynd og samskiptahæfni eru meginmarkmið lífsleikninnar. Samkvæmt Alþjóða heilbrigðisstofnuninni (WHO) er lífsleikni getan til að laga sig að mismunandi aðstæðum og breyta á jákvæðan hátt. Sú geta gerir okkur kleift að takast á við kröfur og áskoranir daglegs lífs.

Samkvæmt Aðalnámskrá grunnskóla er kjarni námsgreinarinnar lífsleikni mannrækt og sjálfsþekking, auk markmiða sem stuðla eiga að frumkvæði, sjálfstæðri, skapandi og gagnrýninni hugsun, aðlögunarhæfni og siðviti til að taka ákvarðanir í síbreytilegum veruleika. (Aðalnámskrá grunnskóla: Lífsleikni. 1999: 7)

Sálfræðingurinn Howard Gardner á heiðurinn að fjölgreindarkenningunni. Hann taldi að greindarhugtakið ætti að ná yfir fjölþætta getu og hæfileika fólks.

Samkvæmt fjölgreindarkenningunni hefur hver manneskja ekki aðeins eina takmarkaða greind heldur margs konar greind sem má efla og styrkja.

Samkvæmt Gardner er erfitt að magnbinda og mæla greind heldur fær hver greind best notið sín í náttúrulegum aðstæðum og daglegu lífi.