Eigandi Memphis Grizzlies selur hlut sinn

Milljarðamæringurinn Michael Heisley hefur selt 70% hlut í NBA liðinu Memphis Grizzlies til hóps fjárfesta fyrir um 360 milljónir dollara. Hópurinn samanstendur af mörgum einstaklingum en sá þekktasti er líklega fyrrum leikmaðurinn Christian Laettner sem lagði skóna á hilluna í NBA í fyrra.

Fjárfestarnir hafa strax gefið það út að ekki séu fyrirhugaðar neinar mannabreytingar í stjórn körfuboltaliðsins, en þar ræður goðsögnin Jerry West öllu í leikmannamálum og Mike Fratello er þjálfari liðsins.

Talið er að Michael Heisley hafi ákveðið að selja félagið eftir að það var rekið með meira en 40 milljón dollara tapi á síðasta ári, en þeir Christian Laettner og fyrrum félagi hans hjá Duke háskólanum, Brian Davis, eru sagðir hafa lagt um 40 milljónir dollara úr eigin vasa í verkefnið.