Dirk Nowitzki fór hamförum

Dirk Nowitzki var gjörsamlega óstöðvandi í morgun þegar Þjóðverjar unnu 108-103 sigur á Angóla í rafmögnuðum þríframlengdum leik á HM í körfubolta sem fram fer í Japan. Nowitzki skoraði 47 stig og hirti 16 fráköst fyrir Þjóðverja, en þetta var í fyrsta sinn í sögu HM sem leikur fer í þrjár framlengingar.

Argentínumenn luku keppni í A-riðli með fullt hús stiga eftir sigur á Serbum 83-79, þar sem Luis Scola skoraði 22 stig fyrir Argentínu og Igor Rakocevic skoraði 25 stig fyrir Serba.

Kínverjar mörðu Slóvena 78-77 þar sem stigahæsti maður mótsins, Yao Ming, skoraði 36 stig fyrir Kínverja og Sani Becirovic skoraði 20 stig fyrir Slóvena. Eftir tap í fyrstu þremur leikjum sínum á Kína enn möguleika á að komast áfram ef úrslit verða liðinu hagstæð í dag.

Þá burstuðu Ástralar lið Katar 93-46 og eiga veika von um að komast áfram.