Cisse byrjaður að væla á ný

Franski sóknarmaðurinn Djibril Cisse hjá Liverpool er enn og aftur farinn að væla yfir hlutskipti sínu hjá félaginu undir stjórn Rafa Benitez. Nú segist hann ekki njóta trausts knattspyrnustjóra síns og vill því ganga til liðs við manninn sem fékk hann upprunalega til Liverpool fyrir 14 milljónir punda, landa síns Gerard Houllier hjá Frakklandsmeisturum Lyon.

"Það var Houllier sem keypti mig til Liverpool á sínum tíma, en ég fékk aldrei að spila undir hans stjórn. Nú er ég með stjóra sem hefur ekki trú á mér og fyrir vikið hef ég tekið skref afturábak sem leikmaður," sagði Cisse, sem er tilbúinn að taka á sig launalækkun til að ganga í raðir Lyon.

"Ef ég þarf að lækka í launum, verð ég bara að taka því, en ég er tilbúinn til þess. Hjarta mitt er alltaf hjá Marseille, en Lyon er stöðugra félag sem er í meistaradeildinni. Eitt er víst, ég þoli ekki að eiga annað tímabil eins og það sem lauk um daginn."