Fær leyfi til að tjá sig um virkjanaframkvæmdir

Yfirmenn Gríms Björnssonar, jarðeðlisfræðings og starfsmanns Orkuveitu Reykjavíkur, hafa veitt honum leyfi til að tjá sig á ný um framkvæmdir Kárahnjúkavirkjunar.Grímur heldur fast í þá skoðun sína að það vanti mikið upp á jarðfræðihlutann í matskýrslu um virkjunina.

Eins og kunnugt er gagnrýndi Grímur jarðfræðilegar rannsóknir framkvæmdanna við Kárahnjúka í greinargerð árið 2002. Þá var Grímur starfsmaður Orkustofnunar og lýsti yfir áhyggjum sínum af virku sprungusvæði undir Hálslóni og áhrif þess á framkvæmdirnar. Grímur hefur verið í fjölmiðlabanni síðastliðna daga að kröfu yfirmanna hans. Aðspurður hvernig tilfinning það er að vera bannað að tjá sig um stærstu framkvæmdir Íslandssögunnar,segist Grímur skilja það þar sem um viðskiptasjónarmið sé um að ræða. Áður hafi hann unnið hjá rannsóknarstofnun og staða hans önnur.

Framkvæmdarstjóri hjá Orkuveitunni, Ásgeir Margeirsson, segir að starfsreglur sem fyrirtækið setji sér um þagmælsku starfsmanna varðandi samkeppnis- og samstarfsaðila hafi að þessu sinni snúist upp í andhverfu sína. Í tilviki Gríms hafi þær valdið tortryggni í garð fyrirtækisins og það hafi verið ástæða þess að tilmælum hafi verið aflétt. Ummæli forstjóra Landsvirkjunar í fjölmiðlum í gær um Grím og gagnrýni hans hafi ekki verið kveikjan að þeirri ákvörðun

Grímur heldur þó fast í gagnrýni sína á undirbúningsvinnu við framkvæmd Kárahnjúkastíflunnar og segir að hún hefði mátt hefjast mun fyrr. Þó sé jákvætt að búið sé að bregðast við nýjum upplýsingum núna.