Mátturinn er með mér

Gamalt máltæki segir að það séu allir froskar stórir í eigin drullupolli. Þetta sannast heldur betur í Cannes þar sem íslenskir blaðamenn eru álíka öflugir og moskítófluga á köldu Reykjavíkurkvöldi. Manni finnst maður nefnilega oft svolítið stór heima á Íslandi þar sem hægt er að tryggja viðtöl og landa skúbbum í krafti þess að maður skrifar fyrir útbreiddasta dagblað landsins. Tölur eins og 67% á hverjum degi og um það bil 110.000 prentuð eintök á dag vega þungt á Íslandi. Í Cannes ná þær því ekki einu sinni að vera fyndnar.

Mér var til dæmis ekki boðið á rauðadregils frumsýningu The Da Vinci Code þar sem SONY hafði aðeins um 200 miðum til að dreifa á fjölmiðla í gervallri Evrópu. Maður getur rétt ímyndað sér hversu ofarlega á forgangslistanum Fréttablaðið frá litla Íslandi var.

Ein eftirsóttasta fjölmiðlauppákoman í Cannes þetta árið verður haldin á morgun þegar blaðamenn fá tækifæri til að hitta sjörnurnar úr þriðju X-Men myndinni The Last Stand. Þetta eru engin smá nöfn og nægir þar að nefna Hugh Jackman, Halle Berry, Ian McKellen, Famke Janssen, Anna Paquin, Kelsey Grammer og Rebecca Romijn.

Ég var einu sinni bálskotinn í Halle Berry en það var þegar hún lék súlustelpu í The Last Boy Scout. Sá þá strax að hún yrði stjarna en hef tekið út það mikinn þroska í millitíðinni að ég er ekkert uppveðraður yfir því að hitta hana. Grammer er sá sem ég er spenntastur fyrir enda einlægur aðdáandi dr. Frasier Crane. Kannski hljóma ég galinn en veit í það minnsta að Kolla Bergþórs vinkona mín skilur mig og væri alveg til í að skipta við mig.

Fox tók upp á þeim óskunda að breyta áætlunum sínum á síðustu stundu og fækka verulega þeim fjölmiðlum sem fá að senda sitt fólk á þessa fundi. Ástæðan er sú að ákveðið var að breyta gigginu úr "international" í "global" en það þýðir að þá þarf bandaríska pressann að komast að og annara þjóðakvikindum er að sjálfsögðu skipt út fyrir þá sem starfa á heimamarkaði. Þetta er auðvitað algalið þar sem heimurinn allur samanlagður er miklu stærra markaðssvæði en Bandaríkin. Þetta vita auðvitað allir nema þeir en svona er það þegar maður telur sig búa í nafla alheimsins.

Mér skilst að öðrum íslenskum miðlum hafi verið úthýst og ég sé sá eini frá Íslandi sem fær að vera memm. Þetta gæti verið heppni ef ég væri ekki óheppnasti maður í heimi þannig að ég hlýt að skrifa þessa lukku á Fréttablaðið og kraftinn sem felst í 110.000 prentuðum eintökum á dag.

Það er semsagt bíó í kvöld klukkan 22 á lokaða X-Men sýningu og feis tú feis við stórstyrnin á morgun.

The Force is with me.