Braut tá gegn Watford

Enski landsliðsmiðvörðurinn Rio Ferdinand verður líklega að draga sig út úr enska landsliðshópnum þar sem hann er væntanlega með brotna tá eftir leikinn gegn Watford. Hversu alvarleg meiðslin eru kemur í ljós í dag en Sir Alex Ferguson, stjóri Man. Utd, sagði við blaðamenn í gær að hann byggist ekki við því að Rio spilaði landsleikina sem eru framundan.

Þetta eru góðar fréttir fyrir Michael Dawson en fastlega er búist við því að miðvörðurinn frá Tottenham muni leysa Rio geti hann ekki leikið. Aðrir leikmenn sem eru meiddir eru Gary Neville, Joe Cole og Jamie Carragher. Andy Johnson er aftur á móti kominn í hópinn í stað Deans Ashton sem er meiddur.