Segir Saddam einangraðan

Einn af lögmönnum Saddams Husseins sakar Bandaríkjamenn um að halda forsetanum fyrrverandi einangruðum og segir þá neita honum um að hitta lögmenn sína og skyldmenni. Lögmaðurinn, Ziad al-Khasawneh, segir að Saddam hafi ekki verið leyft að hitta lögmenn sína síðan í desember á síðasta ári og þá sé honum haldið í litlum klefa þar sem hann hafi fái ekki að fylgjast með fréttum. Einræðisherrann fyrrverandi er í haldi í herstöð nærri Bagdad-flugvelli og kvarta lögmenn hans yfir því að geta ekki undirbúið málsvörn hans almennilega vegna ótryggs ástands í Íraks. Enn fremur segja þeir að dómstóllinn, sem komið hefur verið á fót í Írak til þess að rétta yfir háttsettum mönnum í fyrrverandi stjórn Saddams Husseins, uppfylli ekki alþjóðalög og því muni Saddam ekki njóta sanngjarnra réttarhalda. Ekki er búið að ákveða hvenær réttað verður yfir forsetanum fyrrverandi.