Getum hugað að nýjum tækifærum

Gunnar Örn Gunnarsson framkvæmdastjóri Nýsköpunarsjóðs atvinnulífsins fagnar skilningi stjórnvalda á hlutverki nýsköpunar fyrir atvinnulíf þjóðarinnar, en næstu fjögur árin renna 2,5 milljarðar króna til sjóðsins af sölunandvirði Símans. Sjóðurinn tók til starfa í byrjun ársin 1998. Hann hefur fjárfest í um eitt hundrað fyrirtækjum á undanförnum árum. Þar af á sjóðurinn stóran hlut í um tuttugu fyrirtækjum og tekur virkan þátt í stjórnun þeirra. Nýsköpunarsjóður fær einn milljarð króna þegar á þessu ári sem ráðstafa á til sprotafyrirtækja í samræmi við hlutverk sjóðsins. Fram til ársins 2009 fær hann 1,5 milljarða króna til viðbótar sem varið verður til stofnunar sameignarsjóðs en það gerir Nýsköpunarsjóði mögulegt að fjárfesta í sprotafyrirtækjum ásamt fjárfestum á einkamarkaði. "Þetta eru mikil tíðindi fyrir nýsköpun í landinu. Vandinn er sá að það skortir fé, bæði einkafjármagn og fjármagn frá Nýsköpunarsjóði. Milljarðurinn sem sjóðurinn fær strax gerir okkur kleift að fara að huga að nýjum tækifærum og fjárfestingum. Með einum og hálfum milljarði til viðbótar getum við skoðað tækifæri með fjárfestum á einkamarkaði og beinum þá sjónum að fyrirtækjum sem eru lengra á veg komin." Að sögn Gunnars líða tíu ár frá því að sjóðurinn leggur fé í sprotafyrirtæki þar til hann losar sig út með hæfilegum hagnaði. "Sem stendur er sjóðurinn með fé bundið í fjölda fyrirtækja sem eiga enn nokkuð í land þar til unnt verður að selja hlutina í þeim með nauðsynlegum hagnaði. Staðreyndin er sú að það hefur verið fjármagnsflótti í áhættufjárfestingum sem taka langan tíma að skila arði. Þetta á einkum við um starfsemi sem skammt er á veg komin. Þetta tekur langan tíma og allir eru að flýta sér. Um er að ræða einskonar áhættufælni en auk þess horfa menn til þess hve langan tíma það tekur að breyta góðum hugmyndum í arðbær fyrirtæki," segir Gunnar Örn.