Raikkönen slær ekki á orðróminn

Finnski ökuþórinn Kimi Raikkönen er sallarólegur yfir þeim háværa orðrómi að hann sé þegar búinn að undirrita viljayfirlýsingu um að ganga til liðs við Ferrari þegar samningur hans við McLaren rennur út og hefur ekki reynt að neita honum staðfastlega. "Staðreyndin er sú að ég er samningsbundinn McLaren út næsta tímabil og á meðan ég er ánægður hjá liðinu og sé enga ástæðu til að fara, skil ég ekki af hverju ég ætti að vera að horfa eitthvað annað," sagði Finninn ungi. "Það er ekkert nýtt að ég sé orðaður við Ferrari, því menn hafa talað um þetta í þrjú ár. Það er hinsvegar skiljanlegt að menn tali meira um þetta núna þegar líður að því að samningur minn við McLaren renni út."