Lækna sykursýki með frumutilfærslu

Læknar í Bretlandi telja sig hafa fundið lækningu við meðfæddri sykursýki. Lækningin felst í því að færa frumur á milli líffæra sjúklinganna.  Þessi byltingakennda aðferð hefur þegar verið reynd á nokkrum sjúklingum í Bretlandi með góðum árangri. Í tveimur tilvikum þurfa sjúklingarnir enn að taka inn litla skammta af insúlíni en í einu tilvikinu er afleiðingin sú að sjúklingurinn er algerlega laus við að taka inn insúlín til að halda sykursýki sinni í skefjum. Þetta er 61 árs gamall karlmaður sem fór í þrjár aðgerðir, þá fyrstu í september síðastliðnum og þá síðustu í lok janúar. Hann segir lífið allt annað nú, honum hafi ekki liðið eins vel í þrjátíu ár. Aðgerðin felst í því að tilteknar heilbrigðar frumur eru færðar úr briskirtli í lifur þar sem þær byrja að framleiða insúlín sjálfar. Læknar binda miklar vonir við þessar aðgerð en segja þó ljóst að hún eigi ekki eftir að henta öllum.