Skref í átt að Palestínuríki

Fulltrúar Palestínumanna og alþjóðasamfélagsins sögðust í gær hafa komið sér saman um hagnýt skref í átt að stofnun sjálfstæðs Palestínuríkis. Samkomulagið, sem samþykkt var á alþjóðlegri ráðstefnu í Lundúnum í gær, nær til stjórnsýslu-, öryggis-, efnahags- og félagsmála. Mahmoud Abbas, leiðtogi Palestínumanna, hét því að hrinda í framkvæmd róttækum umbótum á öryggissveitum heimastjórnarinnar, í því skyni að uppræta spillingu og bæta efnahagslegar batahorfur á heimastjórnarsvæðunum. Á ráðstefnunni hétu fulltrúar alþjóðasamfélagsins að veita viðleitni Abbas stuðning. Kom fram að stuðningsríki hefðu heitið heimastjórninni 1,2 milljörðum dala, andvirði 73 milljarða króna, á þessu ári. Tony Blair, forsætisráðherra Bretlands, sagði að ekki aðeins Palestínumönnum, heldur allri heimsbyggðinni, væri hagur að samkomulaginu. Condoleezza Rice, utanríkisráðherra Bandaríkjanna, lét svo ummælt að horfur á friði í deilu Ísraela og Palestínumanna hefðu á síðustu árum aldrei verið betri en nú.