Tímasetning samgönguráðherra góð

Sú ákvörðun Sturlu Böðvarssonar samgönguráðherra að bjóða út þann kafla Reykjanesbrautar frá Vogum að Njarðvík í einu lagi nú í vor hlýtur lof bæði hjá Suðurnesjamönnum en eins hjá forsvarsmönnum verktakafyrirtækja sem hyggjast margir bjóða í verkið enda verkefnastaða hjá mörgum jarðvegs- og malbikunarfyrirtækjum fremur róleg. Áætlaður kostnaður eru tveir milljarðar króna. Á fundi sem haldinn var að tilstuðlan áhugahóps um öruggari Reykjanesbraut lýsti ráðherrann því yfir að tekin hefði verið ákvörðun um tvöföldun brautarinnar á kaflanum frá Vogum að Njarðvík í einu lagi og útboð myndu hefjast strax á vormánuðum. Þeir verktakar sem Fréttablaðið náði tali af voru sammála um að tímasetning ráðherra gæti vart verið betri. Sævar Jónsson, framkvæmdastjóri Loftorku, sagði engu spurningu vera um að hans fyrirtæki tæki þátt í fyrirhuguðu útboði þegar þar að kæmi. "Mér sýnist mjög skynsamlega að verki staðið hjá samgönguráðherra að bjóða verkið út með þeim hætti sem hann tiltók. Í stað þess að bjóða þennan kafla út í tvennu lagi hyggst hann bjóða allt verkið út í einu og það er afar jákvætt fyrir þá sem það vinna og eins er líklegra að þau tilboð sem berast verði enn hagstæðari fyrir vikið. Þess utan skilst mér að sá verktaki sem verkið hljóti hafi frjálsari hendur en gengur og gerist hvað varðar framkvæmdahraða og það er nýmæli hér á landi." Undir þetta tók Sigþór Sigurðsson, framkvæmdastjóri hjá Hlaðbæ-Colas. "Það má til sanns vegar færa að verkefnastaða fyrir jarðvegs- og malbikunarfyrirtæki er lítil hjá flestum íslenskum fyrirtækjum í dag og því er tíminn til útboða núna er afar góður í því tilliti. Þannig verða væntanlega margir um hituna og tilboðin því hagstæðari fyrir vikið. Þetta er alveg tvískipt því í byggingageiranum er mikil þensla og nóg af verkefnum framundan en tiltölulega lítið um jarðvegs- eða malbikunarframkvæmdir meðfram stærri verkefnum eins og við stóriðjuframkvæmdir fyrir austan land. Hjá Umferðarstofu fengust þær upplýsingar að slysaskráningu fyrir síðasta ár væri ekki lokið en bráðabirgðatölur fyrir þann vegarkafla sem tvíbreiður er sýna að milli ágúst og september 2004 urðu sjö slys á þeim kafla en á sama tíma árið 2003 voru þau 17 talsins. albert@frettabladid.is