Tveggja enn saknað

Fjórir skipverjar á flutningaskipinu Jökulfelli fórust þegar skipið sökk skammt frá Færeyjum í nótt. Fimm var bjargað. Tveggja er enn saknað en leit hefur verið hætt vegna veðurs. Það var um klukkan átta í gærkvöldi, þegar Jökulfellið var statt um sextíu sjómílur norðaustur af Færeyjum, sem því hvolfdi. Ekkert liggur enn fyrir um tildrög slyssins enda náðist aldrei talstöðvarsamband við skipstjórnarmenn eftir að sjálfvirkur neyðarsendir um borð fór í gang. Ýmislegt bendir því til þess að skipið hafi oltið á skammri stundu, eða innan við fimm mínútum. Sex metra ölduhæð var á svæðinu þegar slysið varð og vindur 15 metrar á sekúndu sem að öllu jöfnu hefði ekki átt að ógna öryggi skipsins. Það var lestað tvö þúsund tonnum af stáli en gat borið mun meira og var því ekki oflestað. Tveimur tímum eftir að skipinu hvolfdi komu björgunarþyrlur á staðinn og maraði skipið þá í kafi. Um miðnætti var það sokkið. Fljótlega eftir að björgunarþyrlur komu á vettvang tókst að bjarga fimm skipverjum en þeir höfðu allir komist í flotbúninga. Þyrla úr danska varðskipinu Vedderen bjargaði þeim og er skipið á leið til Færeyja með mennina. Að sögn varðstjóra í björgunarmiðstöðinni í Þórshöfn fengu allir skipverjarnir björgunargalla en óvíst er hvort að þeir hafi allir komist frá skipi. Mannlaus gúmmíbátur fannst á floti nokkru síðar en síðan klukkan þrjú í nótt hafa ekki fundist fleiri skipverjar á lífi. Lík af fjórum skipverjum höfðu fundist skömmu fyrir hádegi. Tveggja er enn saknað en leit að þeim var hætt síðdegis þar sem veður á svæðinu er mjög slæmt. Strax í gærkvöldi var óskað aðstoðar íslenskra björgunaryfirvalda og var Fokker-vél Landhelgisgæslunnar þegar send af stað með tveimur mönnum frá Flugbjörgunarsveitinni. Hún sneri aftur hingað til lands síðdegis. Jökulfell var í fraktflutningum fyrir Samskip en í eigu fyrirtækisins KS Difko Nord, skráð á eynni Mön og í áhöfn voru átta Eistar og þrír Rússar. Það var smíðað árið 1989 í Danmörku.