Ný stefna í flugvallarmáli

Ekki er nema hálft ár frá því að Steinunn Valdís Óskarsdóttir borgarstjóri boðaði að Reykjavíkurflugvöllur yrði áfram í Vatnsmýri en í smækkaðri mynd. Nú hefur flugvallarmálið tekið algerlega nýja stefnu. Það var á þriðjudag sem Vilhjálmur Þ. Vilhjálmsson, leiðtogi sjálfstæðismanna í borgarstjórn, sneri óvænt við blaðinu í flugvallarmálinu. Í Íslandi í dag sagði hann að yrði hann borgarstjóri ætlaði hann sér að beita sér fyrir því að Vatnsmýrarsvæðið yrði nýtt undir íbúða- og atvinnubyggð og að innanlandsfluginu yrði fundinn nýr staður á næsta kjörtímabili. Steinunn Valdís sagði við sama tilefni að hún byði Vilhjálm velkominn í hóp þeirra sem vildu flugvöllinn burt. Henni þættu þetta mikil tíðindi. Ekki er liðið nema hálft ár frá því Steinunn Valdís samdi við samgönguráðherra um samgöngumiðstöð á Reykjavíkurflugvelli en þá sagði hún um flugvöll í Vatnsmýri að henni fyndist ekki spurning um hvort heldur hvenær aðalumfang flugvallarins flytti eitthvað annað en hún opnaði á það, og hefði gert það áður, að hluti af flugstarfseminni gæti áfram verið í Vatnsmýrinni en að sjálfsögðu ekki í jafnmiklum mæli og í dag. Spurð hvort hugsa mætti sér meginhluta innanlandsflugsins með einni flugbraut sagði Steinunn það hugsanlegt. Í gær sagði Sturla Böðvarsson samgönguráðherra að Álftanes væri ákjósanlegur staður undir flugvöll. Bæjarstjórinn þar, Guðmundur Gunnarsson, brást hart við í morgun. Hann sagðist ekki skilja hvert ráðherra væri að fara. Hann teldi einfaldlega að ráðherra sem segði svona ætti að segja af sér og fá sér aðra vinnu.