Boðar hertari aðgang í Háskólann

Vegna aðhaldsaðgerða við Háskóla Íslands fækkaði nemendum hans um 321 milli ára. Nemendum hefur ekki fækkað að neinu ráði frá því árið 1992. Páll Skúlason, rektor Háskóla Íslands, segir að neita hafi þurft fólki án stúdentsprófs sem sótt hafi um nám á haustönn um aðgang. Ástæðan sé að ríkið greiði ekki fyrir alla virka nemendur við skólann. Fólkið hafi fengið undanþágu í janúar og nemendum hafi því ekki fækkað á vorönn. Páll segir að þar sem ríkið greiði ekki með öllum nemendunum gæti þurft að grípa til enn frekari aðgangstakmarkana: "Við höfum ekki viljað gera það. Við höfum talið eðlilegt að byrja á því að hleypa ekki þeim inn sem hafa ekki formlegan rétt til námsins." Mikil ásókn hefur verið í Háskólann síðustu ár. Nemendum Háskólans hefur fjölgað um tæpan þriðjung frá árinu 2000.Þeim fækkar nú á sama tíma og fjölgar í háskólanámi almennt um rétt tæp þrjú prósent, samkvæmt tölum Hagstofnunnar.