Óljóst með áframhaldið

Of snemmt er að segja hvort verksmiðjan Fiskimjöl og lýsi í Grindavík verður endurbyggð eftir brunann að sögn Þorsteins Más Baldvinssonar, forstjóra Samherja. Hann kom til Grindavíkur í gær og fylgdist með slökkvistarfinu. Þorsteinn segir miklar endurbætur hafa verið unnar á húsnæðinu síðustu ár. Óskar Magnúson, tilvonandi forstjóri Tryggingamiðstöðvarinnar sem tryggir verksmiðjuna, var einnig á svæðinu: "Bersýnilegt er að helmingurinn af verksmiðjunni er í lagi. Þar á meðal eru eimingargræjur, löndunarhús og geymsla við húsið. Þá virðist sem engar birgðir hafi skemmst." Húsið var byggt árið 1947 og keypt af Samherja árið 1997. Verksmiðjan var mjög tæknileg og sjálfvirkni mikil við vinnsluna en um 1.200 til 1.300 tonn af loðnu voru brædd þar á sólarhring síðustu daga. Eftir á að meta hve mikið tjónið er en nefnt hefur verið að það geti numið allt að einum og hálfum milljarði króna. Það fékkst ekki staðfest hjá Þorsteini í gær.