Jökulfell sokkið, sex manna leitað

Sex manna úr ellefu manna áhöfn flutningaskipsins Jökulfells, sem valt og sökk um 60 sjómílur norðaustur af Færeyjum í gærkvöldi, er enn saknað og hefst víðtæk leit að þeim úr lofti strax í birtingu. Fokkervél Landhelgisgæslunar er um það bil að leggja af stað frá Reykjavík til að taka þátt í leitinni. Sjálfvirkt neyðarkall barst frá skipinu á níunda tímanum í gærkvöldi en ekkert talstöðvarsamband náðist. Það getur bent til þess að skipið hafi oltið skyndilega. Tvö færeysk varðskip voru þegar send á vettvang og danska eftirlitsskipið Vædderen hélt þangað líka ásamt rússneskum togara sem var skammt undan. Brátt fannst Jökulfellið á hvolfi og náði þyrla af Vædderen að bjarga fimm mönnum þar sem þeir héldu hópinn á sundi í sjónum. Síðan fannst mannlaus björgunarbátur og um miðnætti var skipið sokkið. Víðtæk leit í nótt hefur ekki borið árangur en ítarleg leit úr lofti er að hefjast nú í birtingu. Jökulfellið var leiguskip Samskipa og er áhöfnin Eistar. Skipið var á leið frá Lettlandi til Reyðarfjarðar og Reykjavíkur með tvö þúsund tonn af stáli innanborðs. Sex metra ölduhæð var á svæðinu þegar slysið varð og vindur 15 metrar á sekúndu, sem að öllu jöfnu hefði ekki átt að ógna öryggi skipsins.