Tvöföldun haldið áfram

Haldið verður áfram við tvöföldun Reykjanesbrautar strax í sumar, eða mun fyrr en gert var ráð fyrir í Vegaáætlun. Það var Sturla Böðvarsson samgönguráðherra sem tilkynnti þetta á fjölmennum borgarafundi í Stapa í gærkvöldi og sagði að verkið yrði boðið út strax í vor. Það verður syðri hlutinn, eða frá því sem tvöföldunin endar nú austan við Vogaafleggjara og til Njarðvíkur, sem verður tvöfaldaður. Kaflinn er tíu og hálfur kílómetri. Á fjórða hundrað manns voru á fundinum og fögnuðu fundarmenn tilkynningu ráðherra. Ekki er ljóst hvenær hægt verður að tvöfalda norðurenda brautarinnar, í gegnum Hafnarfjörð og Garðabæ, en unnið er að undirbúningi þess.